၁၉၉၁ခုနှစ် ပင်လယ်ကွေ့ စစ်ပွဲ ကာလ တစ်လျောက်
လုံးတွင် တရုတ် ကွန်မြူနစ် ပါတီ၏ ဗဟို စစ်ကော်မရှင် နှင့် တရုတ် ပြည်သူ့ လွတ်မြောက်ရေး
တပ်မတော် တို့က တိုက်ပွဲ ဖြစ်စဉ် များကို မျက်ခြေ မပြတ် စောင့်ကြည့် လေ့လာ ခဲ့ကြ သည်။
စစ်ပွဲ ပြီးဆုံးသည့် အခါ တရုတ် တပ်မတော်မှ ဌာန ကြီးများ၊ စစ်ကျောင်း ကြီးများနှင့်
စစ်ဒေသ ကြီးများက ဗီယက်နမ် စစ်ပွဲ နောက်ပိုင်း အမေရိကန် တပ်မတော်က ဆောင်ရွက် ခဲ့သည့်
စစ်မှု ရေးရာ ပြုပြင် ပြောင်းလဲမှု များ၏ ရလဒ်ကို သုံးသပ် ခဲ့ကြပြီး သုတေသန စာတမ်းများ
တင်သွင်း ခဲ့ကြသည်။
ထိုစာတမ်း များမှ ရရှိသည့် သင်ခန်းစာ
ဖော်ထုတ်ချက် များကို မူတည် ပြီးနောက် တရုတ် တပ်မတော် သည် အနာဂတ် စစ်ပွဲ များတွင်
လေကြောင်း အင်အား၊ သတင်း အချက် အလက် နည်းပညာနှင့် အဆင့်မြင့် နည်းပညာသုံး လက်နက် များ၏
အဆုံး အဖြတ် ပေးသည့် အခန်းမှ ပါဝင် လာမှုကို အသိအမှတ် ပြုခဲ့ ရသည်။ ထို့ကြောင့် တရုတ်
တပ်ဖွဲ့ များကို အစဉ်အလာ အရ ကျင့်သုံး ခဲ့သည့် လူအင်အားကို ဗဟိုပြုသည့် အယူအဆမှ နည်း
ပညာကို ဗဟို ပြုသည့် အယူ အဆဖြင့် ပြောင်းလဲ တည်ဆောက်ရန် ဆုံးဖြတ် ခဲ့ကြသည်။
နည်းပညာမြင့်မားမှုအခြေအနေအောက်မှ
ဒေသန္တရစစ်ပွဲ
၁၉၉၃ ခုနှစ်တွင် သမ္မတ ကျန်စီမင်းက နည်းပညာ
မြင့်မားမှု အခြေ အနေ အောက်မှ ဒေသန္တရ စစ်ပွဲ (Local War Under High- Technology
Conditions) ဆိုသည့် စစ်အခြေခံ သဘော တရားကို ချမှတ် ခဲ့သည်။ ထိုအခြေခံ သဘော တရားတွင်
ထင်ရှားသည့် ဝိသေသ လက္ခဏာ နှစ်ခု ပါရှိ နေသည်ကို တွေ့ရ၏။ ပထမ တစ်ခုမှ စစ်ပွဲ ဖြစ်ပွားရာ
ပထဝီ အနေအထား၊ နိုင်ငံရေး ရည်မှန်း ချက်နှင့် စစ်ပွဲ အချိန် ကာလ များတွင် ကန့်သတ်ချက်
ရှိခြင်းနှင့် ဒုတိယ တစ်ခုမှာ နည်းပညာ မြင့်မားသော လက်နက် စနစ် များကို အသုံး ပြုခြင်း
ဖြစ်သည်။
သို့သော် တရုတ်တို့ အနေဖြင့် အမေရိကန်
တပ်မတော်ကို ထိပ်တိုက် ရင်ဆိုင် တိုက်ခိုက် ရန်မဖြစ် နိုင်သည် ကိုလည်း လက်ခံ ခဲ့သည်။
တရုတ် လူငယ် နေ့စဉ် သတင်းစာနှင့် တွေ့ဆုံခန်းတွင် တရုတ် အရာရှိကြီး တစ်ဦးက အမေရိကန်
တို့နှင့် အဆင့်မြင့် နည်းပညာသုံး စစ်ပွဲကို ရင်ဆိုင် တိုက်ခိုက် မည်ဆိုပါက ကျောက်တုံးကို
ကြက်ဥနှင် ထုသလို ဖြစ်မည်ဟု ဥပမာပေး ပြောကြား ခဲ့သည်ကို တွေ့ရသည်။ ထို့ကြောင့် တရုတ်
တပ်မတော် အနေဖြင့် နည်းပညာ မြင့်မားမှု အခြေအနေ အောက်မှ ဒေသန္တရ စစ်ပွဲကို အခြေအနေ နှစ်ခု
အောက်မှ ဆင်နွဲ ရမည်ဟု သုံးသပ် လာခဲ့သည်။
ပထမ အခြေ အနေတွင် တရုတ် နိုင်ငံသည် တရုတ်
(တိုင်ပေ) အပါအဝင် ဒေသတွင်း နိုင်ငံများဖြင့် နယ်မြေ ပိုင်ဆိုင်မှု၊ နိုင်ငံရေး အငြင်း
ပွားမှု တို့ကို အကြောင်းပြုပြီး ပဋိပက္ခ ဖြစ်ပွားခြင်း ဖြစ်သည်။ ထိုအခြေ အနေတွင် တရုတ်
နိုင်ငံ အနေဖြင့် အင်အား သာလွန်သည့် အနေအထားမှ ဒေသန္တရ စစ်ပွဲကို ဆင်နွဲ ရမည် ဖြစ်သည်။
ဒုတိယ အခြေ အနေတွင်မူ ထိုပဋိ ပက္ခကို အကြောင်း
ပြုပြီး ပြင်ပ အင်အားကြီး နိုင်ငံ ဖြစ်သည့် အမေရိကန်က ဝင်ရောက် စွတ်ဖက် လာခြင်း ဖြစ်သည်။
ထိုအခြေ အနေ တွင်မူ တရုတ် နိုင်ငံသည် အင်အား နည်းပါးသူ အနေဖြင့် အင်အားကြီး နိုင်ငံကို
ခုခံသည့် ဒေသန္တရ စစ်ပွဲကို ဆင်နွဲ ရမည် ဖြစ်သည်။ ထိုဒုတိယ အခြေအနေကို ရင်ဆိုင် နိုင်ရန်
အတွက် တရုတ် တပ်မတော်က နည်းလမ်းများ ရှာဖွေခဲ့ရာ ကန့်သတ်မဲ့ စစ်ပွဲ အယူအဆ ပေါ်ထွက် လာခဲ့သည်။
ကန့်သတ်မဲ့
စစ်ပွဲ
တရုတ် ပြည်သူ့ လွတ်မြောက်ရေး တပ်မတော်
လေတပ် အရာရှိ နှစ်ဦး ဖြစ်သည့် Qiao Laing နှင့် Wang Xiaangsui တို့က ၁၉၉၉ ခုနှစ်တွင်
တင်ပြ ခဲ့သည့် အယူအဆ ဖြစ်သည်။ ၎င်းတို့က အနာဂတ် စစ်ပွဲ များတွင် အမျိုးသား နိုင်ငံ များထက်
နိုင်ငံမဲ့ ဇာတ်ကောင်များ၊ တနည်း အားဖြင့် နိုင်ငံမဲ့ အဖွဲ့အစည်း များက ပိုမို ပါဝင်
လာမည်ဟု သုံးသပ်ပြ ခဲ့သည်။ ထို့ပြင် ရည်မှန်းချက် များကို ကန့်သတ် ထားသည့်တိုင် ထို
ကန့်သတ် ရည်မှန်း ချက်ကို ရရှိ စေရန် အတွက် အကန့် အသတ် မဲ့သော နည်းလမ်း များကို အသုံးပြု
လာကြကာ စစ်ဆင်ရေး နည်းလမ်း များသည် နိုင်ငံတကာ နယ်နမိတ် များကို သာမက အစဉ် အလာ အရ၊
ဥပဒေ အရ သတ်မှတ် ထားသည့် ကန့်သတ်ချက် အားလုံးကို ကျော်လွှား သွားလိမ့် မည်ဟု ဆိုသည်။
၎င်းတို့ ကန့်သတ်မဲ့ စစ်တွင် သမားရိုးကျ စစ်ရေး နည်းလမ်း များသာမက အောက်ပါ စစ်ရေး မဟုတ်သော
နည်းလမ်း များကိုလည်း လက်နက် သဖွယ် သုံးလာ မည်ဟု သုံးသပ်ခဲ့သည်-
(က)
|
သံတမန်နည်း
|
(ခ)
|
စီးပွားရေးနည်း
|
(ဂ)
|
ငွေကြေးစစ် (စတော့ ရှယ်ယာ
ဈေးကစားခြင်း၊ ငွေတန်ဖိုးကျအောင်ဆောင်ရွက်ခြင်း)
|
(ဃ)
|
ဆိုင်ဘာ စစ်ဆင်မှု ( ဟက်ကာများ၊
ဗိုင်းရပ်စ်များ)
|
(င)
|
မီဒီယာနှင့် သတင်း စစ်ဆင်ရေး
|
(စ)
|
ကွန်ပျူတာ ကွန်ယက် စနစ်များကို
တိုက်ခိုက်ခြင်း( ဆက်သွယ်ရေး စနစ်၊ ဘဏ်စနစ် စသည်ဖြင့် )
|
(ဆ)
|
ပတ်ဝန်းကျင် ထိန်းသိမ်းရေး
စစ်ပွဲ ( ဂေဟ စနစ်များ ပျက်စီး စေရန်၊ ရာသီဥတု ဖောက်ပြန် စေရန်)
|
(ဇ)
|
တစ်ဦးချင်း အကြမ်းဖက်
တိုက်ခိုက် မှုများ (ဗုံးခွဲတိုက်ခိုက်ခြင်း၊ လုပ်ကြံသတ်ဖြတ်ခြင်း)
|
ကန့်သတ်မဲ့ စစ်ပွဲ အယူ အဆသည် အင်အား နည်းသူက
အင်အား ကြီးသူ၏ ပျော့ကွက် များကို ရှာဖွေ တိုက်ခိုက် နိုင်သည့် အလား အလာ များကို အခြေခံ
ထားခြင်း ဖြစ်ရာ အမေရိကန်နှင့် ရင်ဆိုင် နေရသော တရုတ် တပ်မတော် အရာရှိ များက စိတ်ဝင်
စားစွာ လေ့လာ ခဲ့ကြသည်။ စက်တင်ဘာ ၁၁ ရက်နေ့ တိုက်ခိုက် မှုတွင် နိုင်ငံမဲ့ အဖွဲ့အစည်း
အယ်လ်ကေဒါက အမေရိကန် အပေါ် သမား ရိုးကျ မဟုတ်သော နည်းလမ်းဖြင့် တိုက်ခိုက် ခဲ့ခြင်းက
ကန့်သတ်မဲ့ စစ်ပွဲ အယူအဆ၏ မှန်ကန် မှုကိုဖော်ပြ ခဲ့သည်။ ထို့ကြောင့် ကန့်သတ်မဲ့ စစ်ပွဲ
အယူ အဆပါ နည်းလမ်းများ အားလုံး ကို တရုတ်နိုင်ငံ အနေဖြင့် အသုံး မပြုနိုင် သည့်တိုင်
ထိုအယူ အဆမှာ တရုတ်တို့၏ စစ်ရေး အတွေး အခေါ် အပေါ် အတိုင်းအတာ တစ်ခု အထိ သြဇာ သက်ရောက်
မည်မှာ သေချာပါသည်။
အမာရှောင်
အမွတိုက်
မော်စီတုန်း၏ ပြောက်ကျားစစ် သနင်္ဂ ဗျူဟာပါ
ဆောင်ပုဒ် အတိုင်းပင် တရုတ် တပ်မတော် သည် အမေရိကန် တပ်မတော်၏ ပျော့ကွက် များကို ရှာဖွေ
ခဲ့ကြသည်။ တရုတ် နိုင်ငံထုတ် စစ်ပညာ စာစောင် အများ အပြားတွင် စစ်ရေး ကျွမ်းကျင် သူများက
ကန့်သတ်မဲ့ စစ်ပွဲ အယူအ ဆပေါ် မူတည်ပြီး အမေရိကန် တို့၏ အားနည်း ချက်များကို သုံးသပ်
သည့် ဆောင်းပါးများ၊ စာတမ်းများ ရေးသား ခဲ့ကြ၏။ ထိုရေးသား ချက်များမှာ တရားဝင် အယူ
အဆများ မဟုတ် သည့်တိုင် တရုတ် တပ်မတော် အရာရှိ များ၏ အတွေး အခေါ် အယူ အဆ များကို ခန့်မှန်း
နိုင်ပေသည်။
တရုတ် တို့က အမေရိကန် တို့၏ အဓိက အားနည်းချက်မှာ
အမေရိကန် ပြည်သူများ အနေဖြင့် ရေရှည်စစ် နှင့် အထိ အခိုက် အကျ အဆုံး များပြား မှုကို
သည်းမခံ နိုင်ခြင်း ဖြစ်သည်ဟု ဆိုခဲ့သည်။ တရုတ်တို့က ဗီယက်နမ် စစ်ပွဲ၊ ဆိုမာလီ အရေး
အခင်းနှင့် ယခု အီရတ် စစ်ပွဲ များတွင် စစ်ပွဲ ကာလ ရှည်ကြာ လာမှုနှင့် ထိခိုက် ကျဆုံးမှု
များပြား လာခြင်းကြောင့် ပြည်တွင်းတွင် စစ်ဆန့်ကျင်ရေး လှုပ်ရှား မှုများ ပေါ်ပေါက် လာပုံနှင့်
ထိုလှုပ်ရှား မှုများ၏ ပြည်တွင်း နိုင်ငံရေး အပေါ် သြဇာ သက်ရောက်မှု များကို စိတ်ဝင်တစား
စောင့်ကြည့် လေ့လာ ခဲ့သည်ကို တွေ့ရသည်။
တရုတ် စစ်ရေး ကျွမ်းကျင်သူ များက အမေရိကန်
တပ်မတော်၏ နည်းပညာ အားသာချက် သည်ပင် အမေရိကန် တို့၏ အားနည်း ချက်လည်း ဖြစ်သည်ဟု ထောက်ပြ
ခဲ့ကြ၏။ အမေ ရိကန်တို့၏ ကွပ်ကဲမှုနှင့် ကြီးကြပ်မှု စနစ်များ၊ သတင်း ထောက်လှမ်း ရှာဖွေမှု
စနစ် များနှင့် ဆက်သွယ်ရေး စနစ်များ အားလုံးသည် သတင်း အချက် အလက် နည်းပညာ များနှင့်
ကွန်ပျူတာ ကွန်ယက်များ အပေါ်တွင် အလွန်အမင်း အားထား အသုံးပြု နေခြင်း ဖြစ်သည်။ ထို့ကြောင့်
ထိုစနစ်၏ ကွင်းဆက် တစ်ခုခု (ဥပမာ၊ ဆက်သွယ်ရေး ဂြိုလ်တု၊ ကွန်ပျူတာ ကွန်ယက် စနစ်) ချို့ယွင်း
သွားသည်နှင့် အမေ ရိကန် တို့၏ ကွပ်ကဲ ကြီးကြပ်မှု စနစ် တခုလုံး ကစင့် ကလျား ဖြစ်သွား
နိုင်သည်ဟု တရုတ် တို့က သုံးသပ် ပြခဲ့သည်။
အမေ ရိကန်တို့၏ နောက်ထပ် အားနည်းချက်
တစ်ခုမှာ အုပ်ချုပ် ထောက်ပံ့မှု လိုအပ်ချက် များပြား ခြင်းပင် ဖြစ်သည်။ အမေရိကန် လေယာဉ်တင်
သဘောင်္ အုပ်စု တစ်ခုသည် ငါးရက်လျှင် တစ်ကြိမ် သဘောင်္များ အတွက် လောင်စာဆီ တန် ခြောက်သောင်း၊
လေယာဉ်များ အတွက် လောင်စာဆီ တန် သုံးသောင်းခန့် လိုအပ် သည်ကို တွေ့ရသည်။ ထိုအုပ်ချုပ်
ထောက်ပံ့မှု များကို အမေရိကန် နိုင်ငံမှ ပို့ဆောင် ရန်မှာ မဖြစ် နိုင်သဖြင့် ဒေသ တွင်းတွင်
ကြိုတင် စုပုံ ထားရန် လိုအပ် လာပေသည်။ ထို့ကြောင့် အမေရိကန်တို့ အနေဖြင့် ဒေသတွင်း
နိုင်ငံများ၏ ပူးပေါင်း ဆောင်ရွက်မှု မရရှိလျှင် ဒေသန္တရ စစ်ပွဲ တစ်ခုကို တိုက်ခိုက်ရန်
မဖြစ်နိုင် သည်ကို တွေ့ရသည်။ ထို့ပြင် အမေရိကန် တို့၏ အုပ်ချုပ် ထောက်ပံ့မှု လမ်းကြောင်းမှာ
ရေကြောင်း ကိုသာ အဓိက မှီခို ဆောင်ရွက် ရမည် ဖြစ်သောကြောင့် ကုန်သွယ် ရေလမ်းကြောင်း
ပေါ်ရှိ မလက္ကာ ရေလက်ကြား ကဲ့သို့သော အချက် အခြာ နေရာ များတွင် ပိတ်ဆို့ ဖြတ်တောက် ခံရမည့်
အန္တရာယ် နှင့်လည်း ကြုံနေရ ပေသည်။ တရုတ် စစ်ပညာရှင် များက ထိုအခြေ အနေ များသည် မိခင်
ကုန်းမြေကို ကြောပေးပြီး တိုက်ပွဲ ဝင်ရမည့် တရုတ်တို့ အတွက် အားသား ချက်များ ဖြစ်သည်ဟု
သုံးသပ် ပြခဲ့သည်။
ထိုအချက် များအပေါ် အခြေခံ ပြီးနောက် တရုတ်
စစ်ရေး ကျွမ်းကျင်သူ များက အာရှ ဒေသတွင်း ဖြစ်ပွား လာနိုင်သည့် ဒေသန္တရ စစ်ပွဲ များတွင်
အမေရိကန်တို့ ပါဝင်မှုကို တားဆီး နိုင်ရန် အတွက် တရုတ် တပ်မတော်သည် စစ်ပွဲအား အချိန်တို
အတွင်း ပြီးဆုံးအောင် တိုက်ခိုက် ရမည် ဟု ဖော်ထုတ်ခဲ့သည်။ ထိုကဲ့သို့ အချိန်တို အတွင်း
တရုတ်တို့၏ စစ်ရေး၊ နိုင်ငံရေး ရည်မှန်း ချက်များ အောင်မြင်အောင် ဆောင်ရွက် နိုင်ပါက
အမေရိကန် နိုင်ငံ အနေဖြင့် တရုတ်တို့ ရရှိ ထားသည့် အခြေအနေကို ပြန်လည် ပြောင်းလဲ ပြစ်ရန်
မဖြစ်နိုင်တော့ သို့မဟုတ် ပြန်လည် ပြောင်းလဲ နိုင်ရန် ကြိုးစား ပါက ရေရှည် စစ်ဖြစ်ပြီး
ထိခိုက် ကျဆုံးမှု များပြား မည်ဟု ယူဆပြီး စွတ်ဖက်မှုကို ရပ်တန့် သွားမည်ဟု ထိုပညာ ရှင်များက
အဆိုပြုခဲ့သည်။ ထို့ကြောင့် တရုတ် နိုင်ငံ ပါဝင်သည့် ဒေသန္တရ စစ်ပွဲ၏ အစပိုင်း ကာလတွင်
အမေရိကန် နိုင်ငံက အင်အား အလုံး အရင်းနှင့် ဝင်ရောက် စွတ်ဖက်ခြင်း မပြု နိုင်အောုင်
နည်းလမ်း မျိုးစုံဖြင့် ဆောင်ရွက် ရမည်ဟု ၎င်းတို့က တင်ပြ ခဲ့ကြသည်။
ထို အဆိုပြု ချက်များမှ တဆင့် စစ်ပွဲ၏
အစပိုင်း ကာလတွင် အမေရိကန်တို့ ဝင်ရောက် စွတ်ဖက်ခြင်း မပြု နိုင်အောင် တရုတ် တို့က
ဆောင်ရွက် လာနိုင်မည့် နည်းလမ်း များကို အမေရိကန် ရန်းကော်ပို ရေးရှင်းမှ ပညာရှင် များက
မှန်းဆ ဖော်ထုတ် ခဲ့ကြ လေသည်။
ဆက်လက် ဖော်ပြပါမည်။
ရဲထွဋ်
International Eleven : 12-07-2007
မှီငြမ်းပြုစာစောင်များ
၁။
|
အောင်မျိုး(မောင်)၊တရုတ်ပြည်သူ့လွတ်မြောက်ရေးတပ်မတော်အကြောင်းတစေ့တစောင်း၊
ပြည့်စုံစာအုပ်တိုက်၊ ၂ဝဝ၇
|
၂။
|
Cliff, Roger and
Others, Entering the Dragon's Lair : Chinese Antiaccess Strategies and Their
Implications for the United States , RAND Corporation, 2007
|
၃။
|
Mulvenon, James C. and Others, Chinese
Responses to US Military Transformation and Implications for the Department
of Defence, RAND Corporation, 2006
|
No comments:
Post a Comment